No Item
文、攝：容啟謙
天悅廣場（Smiling Plaza，下稱天悅）是位於深水埗元州街的一個商場，一般大眾最認識的是步陞鞋業、又或者會對旁邊大廈張貼「反對學基浸信會屋頂十字架對正本大廈」的告示更有印象。一旁的天悅外觀乍看平平無奇，進入一看就會發現甚至集齊了「死場」的特徵：昏暗的燈光、在炎炎夏日因商場管理不善而感受到的悶熱等，理應人流不多，但每逢放工放學時或假日時段竟然會擠得水洩不通。只有我們集換式卡牌（Trading Card Game，下稱TCG）的玩家知道[1] ，天悅是TCG卡game在全港最集中的地方，稱呼天悅為全港卡牌的「港交所」也不足為過。筆者訪問了兩位TCG卡店老闆，欲了解更多以天悅為中心的TCG玩家及商戶社群。
作為天悅廣場核心的火星
天悅內的卡舖密度可謂冠絕全球（按：筆者早前到秋葉原已fact-check，兩地差異之多，最為明顯的是土地因素），眾多卡舖中要數最為人熟悉的，位於一樓的Mars 絕對穩座三甲之內。提起Mars，就不得不提琳琅滿目的卡牌周邊，和廣大玩家都熟悉的店員Mandy姐。Mandy姐在Mars 工作超過十年。Mars 的老闆Connie長年移居日本，兼顧與日本公司處理批發事宜，店內不少大小事務均由Mandy姐打理。Mars 主要有提供不同卡牌的官方商品（例如補充包、基本卡組等）[2]，以及堪稱全港最齊的卡套週邊牌周邊可供零售和預訂。不論是用作保護單卡的卡套、收納卡組必備的卡盒、玩卡時作為場地的卡墊，甚至乎在遊戲過程中要用到的骰子或計算指示物等，應有盡有。
與其他因興趣而開卡店的老闆不同，Mandy姐以往從事零售，未曾接觸卡牌遊戲，一開始只抱著「打份工」的心態返工。當時Mars 在馬鞍山富輝花園商場也有店舖，老闆在Mandy姐入職初期曾問她有沒有興趣到馬鞍山上班，但她認為馬鞍山不及長沙灣方便，故一直留在天悅，不知不覺十多個年頭了。Mandy姐分析，馬鞍山的卡舖因地理位置緣故，人流有限，主要服務馬鞍山及沙田區的玩家，所以馬鞍山店在2012年天悅店開業後就結業了。
至於為何當時選址落戶天悅？Mandy姐尚未入職，當時落決定的是老闆Connie姐。據她理解，十年前的天悅已經集中了不少卡舖，「當時已經有好多卡舖開入嚟，以前已經有人開落做旺個場。不過呢個場不嬲流轉性高，成日開業、結業、易手、改名，係得幾間會keep住喺呢個場到屹立不倒。」Mandy姐不疾不徐地道出她所觀察的天悅商店生態。「尤其是近呢幾年開嘅卡店，有唔少係三五個玩家夾份合租。當然佢哋都有賣少量官方貨同埋散卡，但佢哋嘅思維更多係為賺份租就算，賺唔到就大家貼啲錢，志在有個『私竇』同班friend有地方玩卡，同我地啲真係營運做生意嘅思維有出入。」Mandy姐指，整個天悅真正「做生意」與「私竇」的比例若為2:8之分。不管比例如何，天悅的確有很多卡舖，那麼為甚麼TCG界的「港交所」會在天悅而不是在同樣深受動漫愛好者歡迎的旺角信和中心呢？「信和同天悅個生態都唔同，佢哋嗰到一嚟競爭大啲啦，加上佢哋個場主要係追潮流炒賣為主，一間舖裏面會賣好多元嘅野，務求吸引多啲街客。」她點出兩個動漫周邊熱點的不同，「同埋最緊要就梗係天悅啲租平啦！喺呢到開，就可以賣得專門啲，會多啲熟客返轉頭搵你。」
講起天悅的特色，Mandy姐就露出又愛又恨的神情：「租平就走唔甩㗎啦，當然都會引到唔少『私竇』入場，影響市場。同埋其他零售唔會見到嘅係：會有『艇仔』係商場內兜售散卡。以前再多啲嘅，宜家已經唔係好覺眼同已經習慣咗。只要唔好直接喺舖內或門口影響做生意嘅話都當睇唔到。」相信走廊上為數不少的「艇仔」所造成的人潮和「航」出來的枱亦是不少人第一次到訪天悅最深刻的印象，每逢放工放假的日子定會有玩家聚集，場面好不熱鬧。Mandy姐認為恰好因為平日天悅人流不算多，加上管理不太嚴格，管理公司某程度上默許在不影響人的情況下「隻眼開隻眼閉」。可能正因各種不同的因素交織，才能造就天悅現今「卡界港交所」的模樣。
玩家面面觀
每當講起TCG或動漫愛好者，大家腦海浮現的可能是油頭垢面的肥宅形象。身為店員的Mandy 姐可不認同這種講法：「玩卡都係興趣嘅一種，其實同打羽毛球一樣，大家反而唔會對鍾意打羽毛球嘅人有固定嘅刻板印象。我啲客咩人都有：醫生、律師，甚至係明星，同埋達官貴人嘅仔女都玩卡嘅！」「不過如果真係要加標籤俾佢哋，我會形容佢哋比較純品同有禮貌。」
Mandy姐憶述以往同樣從事零售業的經歷作比較。「例如做便利店嘅話要面對成個社區唔同嘅人，咁你知咩人都有㗎嘛，唔係個個人溝通能力都好。玩卡嘅人就可能成日都焗住要同其他人交流，加上佢哋黎買嗰樣野係自己『心頭好』，所以基本上相處都幾融洽同開心。有時知道個客死慳死抵先買到想要嘅卡，佢哋嗰種熱誠都真係唔惹少。」
「可能係啲客嘅開心感染到自己，會多左同客分享佢哋啲喜悅，大家就好似老朋友咁親切，有啲仲見證住佢哋成長同人生大事。自己都因為同佢哋傾開偈而跟貼多左潮流，無返呢份工我諗都聽唔明佢哋講咩『Firm』、『0尊』呢啲字，哈哈。」
營運生態的變化
「不過咁樣講返起，天悅都變左好多了，以前嘅天悅咩舖頭都有好旺㗎，仲有兩間戲院添。」筆者實在未經歷過和無法想像「好旺而又唔係賣卡嘅天悅」，只能聽Mandy姐娓娓道來。「我嗰陣就未入來天悅嘅，我都係聽隔離阿牛哥、牛嫂（鄰近友好的牛仔褲店的老闆，該牛仔褲店已結業，現址為金豐遊玩王）講㗎咋。以前天悅呢到最多就係賣衫，人流最多嗰邊，其實係怪獸嗰邊（另一邊商場，詳見下圖），因為嗰邊宜家波樓嗰邊以前係美食廣場，賣好多口立濕好旺㗎；呢邊就因為樓上係茶樓，所以都有唔少茶客帶旺吓人流。加埋又有戲院都幾多人逛吓嘅，不過到西九龍中心開張之後，佢樓層又多，又有food court，又多野行，人流就自然少左，啲舖就逐漸走，同埋啲租就開始平喇。」
1992年開業的天悅曾是區內人流數一數二的商場。但隨著同區的西九龍中心於1994年開幕後，天悅內店舖的類型就因人流銳減，開始趨向單一化。在文章開首提及的學基浸信會前身是樂聲戲院，而華聲戲院則成為桌球會。Mars在天悅內經營十餘年，變化也不少，「我地舖內格局就最多執吓位，無乜大喐嘅，不過格離間舖都有唔同。起初，你都知係有租多間舖俾啲人打deck（即玩家間的切磋交流）㗎（筆者在初中時期也是常客xd），但其實mark數、管理咁，都幾多零丁野做，有時大家玩得太投入會唔記得時間會超時，咁嗰時又要提醒啲人要補鐘。所以喺近呢七八年間都轉咗做集運倉，去到宜家都keep住有三百幾人用我地嘅日本集運㗎。」
除了營運上有所轉變外，整個TCG界風氣的轉變Mandy姐也看在眼內。「會見到玩家少咗，炒家就多咗。始終互聯網太發達喇，每個人有個account就可以喺Facebook 啲交收討論區買賣。先唔講做散卡嘅舖面對無租金負擔嘅『艇仔』競爭會越來越大，再加上日本網購越來越方便，所以你見我地都無乜點做散卡。」
「以前大家玩卡係『開心』為主，會見到啲客，同埋三五知己放學之後柴娃娃咁玩卡，咁開到靚卡都開心嘅；宜家大家玩卡或者開到靚卡，第一時間係諗幾錢、回本未，會覺得無左當年純粹嘅樂趣。不過宜家啲卡又真係可以去到好貴，所以開中都好戥佢哋開心嘅。」Mandy姐還分享，以前平日的午飯時間會有不少附近的中學生前來抽卡，在放學時間甚至有別區學生特意前來。「拔萃呀喇沙呀，名校嘅學生都鍾意玩卡㗎。不過今時今日啲啲學生好忙㗎，就算放學時間都無咩校服客喺天悅囉。」在Mandy姐眼中，十年前和今日的天悅光景已經不盡相同，似乎其中沒有變的是Mars仍在天悅細看TCG和眾玩家的變遷。
從TCG玩家到開卡舖
「你玩開卡都知，喺呢個場有幾多卡舖過到十年㗎？」在距離Mars一巷之隔的萬事屋日本代購專門店——人稱Devil的老闆如此說道。Devil自中學開始就有接觸TCG，以往曾經在日本留學，遂開始代購生意。經歷了幾年打工儲蓄的生活後，毅然開店全職做代購。當時Devil的理想選址並不是天悅廣場，「嗰時係諗住喺白田㗎，貪嗰度多學校，估多啲學生客，不過最後同業主傾唔掂，所以先無租。」Devil表示「無著落」的狀態都維持了一整年。一愁莫展之際，恰逢Devil相熟的卡舖鄰近有空舖，所以他就把心一橫入駐天悅了。
講到天悅的地理優勢，Devil毫不猶豫地回答：「近我返屋企囉！」他坦言本身代購生意與地理位置不太相關。但正正有舖位在天悅，自己又有玩卡的習慣，所以舖內的卡愈來愈多了，Devil笑言當時有朋友也有問他「點解一間代購店有咁多卡」。又剛好有朋友「退坑」[3]，不論貨量或種類都已經好齊，所以Devil索性開始做散卡生意了[4]。
Devil一開始主打做的卡game是Gundam War和Crusade，因為自己也是玩家一份子，「咁高達系列出名吖嘛，又玩咗都好幾年。」往後適逢Gundam Crusade十週年時，官方豪言壯語表示「想做好隻game」。誰不知，官方也在同年戲劇性宣佈，不再推出新卡片，亦不再舉辦官方比賽。「嘩！嗰時真係毀滅性打擊，大家都會講『一夜變哂做軍票』，我諗啲貨同散卡無咗都十幾廿萬，最慘就係隻game唔做嘅時候，啲player客源會一齊消失。」當時Devil形容整個卡界都「好迷」，為人熟知的日本大型玩具供應商Bandai當中的卡牌部門Carddass在一年間結束三款卡game的營運。幸好萬事屋新主打的TCG正值回春期。「嗰陣揀BS（全名為Battle Spirits）係因為都出左八年，啱啱好佢又出好多熱門IP（系列）好似咩數碼暴龍啊、蒙面超人啊，好彩都吸引到唔少新player加入，都算做得住，所以一做就做左四年，直到宜家了。」
不只是老闆
「今時今日去開卡舖嘅，肯定係有玩（卡）嘅，唔玩卡既點會開卡舖！」除了第一代將TCG當成玩具賣的玩具店外（後按：前文提及的怪獸商場背後的大老闆Connie的兄長正是玩具店背景出身的，Devil觀察果然細膩！），Devil斷言開卡舖的每個老闆必然是TCG玩家出身。他認為卡舖與一般零售業大相徑庭，不是只向批發商入貨賣貨。「仲要識得同玩家傾計，同埋有獨到見解，甚至要教埋點樣用㗎，呢啲額外功夫一個都唔可以少，係真係名副其實嘅『服務性行業』。如果同個客唔啱嘴型嘅話，下次咪去下間，唔幫襯你囉。」「你行其他玩具嗰啲唔係咁樣㗎，好似啲game舖咁，你行黃金都係格價，見到啱價錢就買。你唔會問埋嗰個好唔好玩㗎嘛，甚至宜家新做嗰啲可能都無打開機，可能當普通軟件咁賣添。有時會覺得開餐廳都冇咁辛苦，勞力可能唔夠多，不過心力就多好多！」
Devil都有指出，今時今日做卡舖最大的對手是社交平台或者網上討論區。「咁佢哋又冇交租壓力，淨係諗自己啲卡走唔走到，唔會同你諗市場，或者啲舖頭點㗎嘛，所以啲『艇仔』有時都好鍾意做低個價『做爛市』。」萬物皆有危有機，又因討論區的玩家經常爽約，令到實體店舖的優勢顯現。「我哋打開門做生意，同開咗咁多年有信譽嘛，同埋你來舖頭買就有現貨可以拎走，唔使再額外就大家交收時間。有時新彈數出前，會做新卡預訂就更加係咁。有啲玩家其實貨量有限但又要學人做預訂，結果有時某啲單卡價格浮動嘅時候，或者（啲卡）唔齊，就俾唔到貨人。我哋開舖頭就算唔夠貨都好，蝕住錢收返再交足貨俾人都唔係第一次。最多咪賺少啲，做得住個信譽之後，啲客都會返返轉頭搵你。」Devil強調顧客的體驗開心十分重要，尤其是TCG圈子人少，玩家客群不多，玩家之間的訊息流通很快，所以店舖誠信更為寶貴。
會影響店舖生意的因素真不少：有些是做好自己本份，持續進步就可以，有些卻怎麼避也避不到。「突然執笠嗰啲唔講啦，遊戲官方會定期檢討整個遊玩環境，比賽賽場嘅數據。有啲卡佢發現大家都用，但係好難入手，佢就會諗方法出一啲新商品再收錄（重印），你可以理解成為『人人有卡玩』，玩家角度自然開心，但係做散卡嘅舖頭就傷喇。」Devil解釋舖頭內的散卡除了自己開封卡包而來的，還有不少部分是設立「買取表」明碼實價向玩家回收的。「收返嚟嘅卡可能都五六十蚊一張，一次再錄可能就會跌到五蚊都唔知有冇。仲有官方會因應環境平衡，或者漏洞，限制禁止唔俾用一啲卡。嗰啲除咗收藏家會好平咁買返去收藏之外，基本上冇人會買。」Devil形容每次官方出卡都要打醒十二分精神：除了要思考卡本身的效果之外，在店舖的角度，也要思考該卡大概價值為多少、帶同舊卡一併升值的空間、推測未來官方出卡的思路是如何等等，可謂隨時隨地要與官方「鬥智鬥力」。
「不過講就咁講，遊戲平衡真係好重要。做得好嘅話，就會喺賽場見到好多唔同種類嘅卡組都有得玩；做得唔好嘅，就會每一副卡組都起碼有一半嘅內容都係一樣，甚至乎大部分都可以係同一副卡組。咁所以就算禁卡表更新或者再錄都好，即使對卡舖嘅打擊有喺度，但係你問我，我就覺得環境健康最緊要！咁代表官方都想個環境做好啲，點都好過佢放飛之後就執，因為一隻game嘅player係重要過啲收藏家的。」可能很多人都會覺得開舖做生意的信條是為了利潤最大化，但我見到由玩家開設的卡舖除了賺錢的個人利益外，對自己有份參與TCG的熱愛和愛惜之心也是不能小覷的——始終在「老闆」這個身份之先，他們本身也是一名熱愛該TCG的「玩家」。
在天悅成為「TCG港交所」前
Devil憶述在自己在為玩家最為活躍的千禧年間，當時天悅尚未成為卡界的「港交所」。「嗰時玩卡未係集中喺天悅，反而係其他區都旺。當時做得最大嘅，全部都唔喺天悅：鑽石山荷里活啦、荃灣通用啦、葵芳龍之堡啦，舊時啲『艇仔』係興企喺大卡舖門口兜售，搞到舖頭門口長期都有五、六十人聚集，好誇張㗎。當時大家未興用互聯網，大家真係每日都落卡舖先追得貼個市。可能就係多『艇仔』係正門口搵食，以前又係啲咩『劉德華時代』嘛（按：今時今日咁嘅服務態度點得㗎），個老細又唔敢得失啲客，結果連舖頭都執埋。」
當時熱門的交易現場逐漸消失，不過玩家的需求又一直都在，那該如何是好？「嗰時天悅就開始多卡舖，咁player係流動㗎嘛，大家就會喺長沙灣地鐵站交收。雖然而家都有唔少人會喺嗰度交收，但係一開始係一個鐘有五十幾人聚係站內喎。咁地鐵其實係唔俾交收㗎嘛，啲人咪枕住枕住咁係天悅交收、睇卡簿囉。」雖然天悅內張貼了「禁止私人兜售商品」的公告，但依然難阻玩家相約交收。「咁所以話管理唔嚴就係咁，有唔好嘅位，都有好嘅位。」「呢個場呢，以前都可以唔係淨做卡嘅，不過近呢幾年一定係卡game嘅代詞。甚至有時會有遊客同埋外國嘅節目專登嚟朝聖㗎！」似乎天悅作為香港TCG集中地的背後是有着千絲萬縷的關係：商場鄰近地鐵站、有享受做TCG零售的店舖、看重玩家體驗的散卡卡舖，以及一班對TCG充滿熱情的玩家。
後記
筆者是一名卡齡14年的TCG玩家，中學時期基本上一星期會去一次天悅。投身社會後，因為時間不多，會在自己區內的卡舖「打躉」為多。每次去天悅其實都目的明確：不是相約交收，就是去參加店舖賽。文中的兩位「天悅人」本身互相認識，而只要是常在天悅出沒的玩家都會認識他們。他們其實也認得筆者，但平時只會吹兩句水（Mandy姐：「梗係認得啦，睇住你細細個就開始嚟啦。不過係唔知你叫咩名姐。」）反而是藉著訪問才有「正當性」跟這些熟悉面孔重新認識和自我介紹。
他們所看到的TCG世界和我所認知的有一部分高度重疊：例如我們可以滿口TCG術語，交流得如魚得水；但同時也有一部分截然不同！例如以前那個「掃街天堂」葵涌廣場和荷里活這樣的大商場竟然有卡舖，原先的天悅又不是我一直以來認識的模樣。因大家在天悅所處的位置和身份不同，即使在同一商場內，每個人的視角和經歷都令人難忘。同時也要多謝城市日記「香港時地人」這個計劃，令我體驗到社區故事原來可以感到既熟悉又新奇。雖然個人狀態在這半年間不太好，但我再一次被個人興趣與社群活力所治癒。誠意邀請大家走進身邊不論熟悉與否的社區，一同感受社區中的社群，認識他們的故事。
註釋
[1] 集換式卡牌（Trading Card Game），簡稱TCG，是一種卡牌遊戲的一種。與其他卡牌遊戲（例如：三國殺、啤牌）不一樣的是：其他卡牌遊戲會有固定的牌池和與所有玩家共用同一個牌池，例如標準版三國殺會有108張牌，共有54張基本牌（「8桃3酒14酒29殺」）、啤牌會有52張固定花色的卡牌。而TCG玩家要在開始遊戲前要準備自己的卡組（Deck），而deck的內容會由該卡牌遊戲官方發行的卡中選擇40-50張卡組成卡組。不同TCG對deck的要求不一：例如PTCG（Pokémon trading card game）的deck固定數目為50，而Battle spirits和遊戲王要求deck的數目下限為40。
[2] 補充包、基本卡組是卡牌遊戲官方發行新卡的方式，官方會定期（通常為三個月不等）推出新效果的卡。補充包是以卡包形式抽該系列收錄的卡，當中會以不同稀有度隨機封入卡包內；而基本卡組則是每個商品內都收錄一樣內容且新推出的卡（按內容而訂可能會再錄熱門難入手的單卡以刺激銷量）。官方角度是用基本卡組已經可以進行遊戲。雖然符合規則但強度堪憂，事實上更多玩家會買兩副及額外再加不同的卡才能增強基本卡組，令其有較良好的遊玩體驗。
[3] 「退坑」是指退出某一個圈子。圈內玩家認為TCG是個要用不少錢「供養」的興趣，像一個無底洞的「坑」。「退坑」一詞也適用於其他不同要耗費大量金錢的興趣如：追星、攝影等。
[4] 散卡是指一般遊戲官方發行的新卡形式是用補充包、基本卡組。不想抽卡包（或抽不到想要的卡）的玩家會轉去卡舖或討論區上直接購買已經抽出的散卡。當然散卡會按稀有度和市場需求而言訂價，實用又稀有的單卡可以貴卡包很多倍。
