No Item
文、攝：許寶泠
前言
我喺油塘生活咗超過十年，但一直以嚟都覺得油塘咩都無。直至有次搭小巴嘅時候，聽到個菲傭姐姐話好鍾意油塘。我當下係有啲詫異，同時係心裏面埋下咗種子。聽到要做一份有關社區嘅功課嗰陣，我就已經鎖定咗油塘。為咗了解呢個地方，我搵咗住係度嘅三位朋友仔傾偈，分別係陳嘉晉、盧凱欣同林葆怡，想知佢哋通常去邊度玩。
東隧籃球場
一開始，我係油麗嘅籃球場遇到嘉晉，佢一個人喺度練波。但之後傾偈，我先知原來佢平時鍾意落東隧打波，因為油麗嗰個太多蚊，而且喺東隧仲可以同其他人鬥波。嗰次，去東隧搵佢嘅時候，見到佢同緊一班人打波。我以為係本身認識嘅朋友，但一問先知原來佢哋係球場上認識嘅波友嚟。佢哋年紀上都差唔多，除咗有一位係叔叔。當問到同其他波友點認識，嘉晉都會話打吓打吓就認識咗，但唯獨同叔叔嘅認識係特別印象深刻嘅。嘉晉分享到佢一開始因為朋友落嚟打波，後來有大約有一年左右無落嚟打。有一日再落嚟打波嘅時候撞見呢位叔叔，佢就行埋去問「咦，咁耐無見你嘅！」自此之後，佢哋就熟絡咗，當嘉晉遇到咩煩心事，都會同呢位親切嘅叔叔講。
東隧遊樂場
平日，凱欣同葆怡會在學校（聖安當女書院 ) 打排球，而到咗學校關門嘅時候，佢哋就會到東隧嘅球場打。但好多時都要等無人用先可以打，葆怡就話真係希望可以有個排球場用。雖然設施上滿足唔到佢哋嘅需要，但佢哋有提到有位保安好體貼，會同佢哋講，可以喺廁所和籃球場嘅空地打波，埋少少、唔阻到人就無問題。呢位保安周不時會同佢哋傾偈，有時有人唔見咗嘢，大家都好樂意幫手搵啊！
三家村
當問到嘉晉油塘最靚嘅地方時，佢即刻話係三家村嘅日落。但原來唔止佢，好多油塘人都愛到三家村散步㗎。凱欣同葆怡都好鍾意喺放咗學之後去三家村嘅海灘睇海、傾心事。佢哋而家唔同班，所以特別享受坐係海灘同對方分享吓自己今日係班上發生咗咩特別嘅事。到咗日落時份，佢哋會上燈塔，嗰度可以望到一望無際嘅大海。返屋企嘅途中，會經過一個士多，佢哋會買啲零食，然後邊行邊食。
後記 怪姐姐嘅搭訕經歷
雖然我住咗喺到好多年，但一直覺得自己好似局外人咁，尤其當需要同街坊傾偈嘅時候，就覺得好迷惘、無從入手。一開始唔多順利，首先我假裝隨意周圍行，查實眼睛就兩邊望不停搵目標，最後鎖定咗一個坐喺長椅側邊有個籃球好專心打機嘅男仔。我有少少緊張，匿咗喺棵小樹後面踱步， 諗住準備一下，但愈搞就愈緊張，就索性唔理三七二十一慢慢咁衝過去。我輕輕移動身體，神不知怪不覺咁靠近佢，然後嘗試用輕鬆隨意嘅語氣問佢 :「Hello 小朋友介唔介意講兩句啊？」我感覺到佢身體瞬間繃緊，個頭微微抬起，眼角望一望我，當即回答話：「我等上堂咋！」（潛台詞係「唔好攪我」)，同時隻手已經執緊嘢。未等我再講咩，佢就已經走咗十萬九千里了。
食咗個檸檬之後，我再係公園散步，見到行過嘅人都同佢哋打招呼，佢哋通常會望吓側邊，發現我真係同佢哋打招呼時，就會開始迴避我，盡量唔同我有眼神接觸。後來，同學同導師都有分享同街坊傾偈嘅心得，後來嗰個星期，自己都調整咗心態。嗰段時間，我放完工都會喺屋企附近行吓。大約花了一星期左右，遇到陳嘉晉，佢好願意接受訪問，但前後都用咗一個月去拎到佢媽媽嘅同意去做訪問，而訪問完成後兩星期左右就遇到盧凱欣同林葆怡。
感想
東隧籃球場一直都好受歡迎，甚至外面嘅人都會入嚟打波，所以人好多，我基本上唔會入去，通常會去隔離比較空嘅足球場跑步。因為訪問嘅關係，我多咗喺籃球場附近走動，留意到呢度好多都係廿幾歲嘅男仔打波、鬥波。而通常年紀好似陳嘉晉咁，比較細嘅，就係嚟上堂，各大媽媽就喺側邊嘅長櫈傾偈。另外，原來好多住喺油塘嘅人都有去過三家村睇日落。其實油塘有好多地方睇日落都好靚，例如魔鬼山、東隧嗰條天橋、地鐵站B出口對出嘅位置等等，但獨獨三家村嘅日落係佢哋心目中佔上一席位，我仲好記得當佢哋分享到喺三家村睇日落時所浮現嘅笑容。
作為一個住喺油塘咁多年嘅人，我極少喺油塘活動，甚至都無去過三家村。對我嚟講，最令我舒服自在嘅地方係大本型嘅天台花園。佢成個花園嘅空間佈置都花咗唔少心思，以瀑布水池為中心，正前方係兒童遊樂設施，一旁係開陽嘅露台，而後方則係一條由兩旁被唔同植物包圍且延申至頂蓋嘅隧道，形成一個隱蔽嘅空間。而且，裏面擺放咗一啲長櫈，每張櫈之間有一段距離，好適合談心，或者獨自發呆。除此之外，呢度都好有心去推廣生態知識，例如有一個展板係以陶瓷去整唔同嘅樹葉，旁邊會有佢哋嘅生物知識同相關嘅故事，等我哋認識身邊好容易被忽略嘅植物。平時，我同細佬最鍾意去鯉魚門廣場嘅 Hana Eggettes 買一份雞蛋仔同格仔餅，再上去天台花園嘅露台。望住遼闊嘅海景，一邊食嘢，一邊傾偈。有時，我哋就只係靜靜咁食嘢，感受著陣陣涼風吹過，已經覺得好舒服！
