No Item
文、圖：袁曉敏
【intro】
Comfort food，上網睇佢嘅英文解釋係話：the type of food that people eat when they are sad or worried, often sweet food or food that people ate as children.
但對於我嚟講comfort food可能係sad或者攰嘅時候食，但其實我最需要佢嘅時候，通常都係放假或者出去做野之前個早餐，我就會揀返我嘅favourite去幫襯。因為freelance嘅關係，好多時要出去食嘢，當我做到好攰，茶餐廳、湯粉面呢啲鋪頭一定係我嘅選擇，而且價廉物美，一定走唔甩。漸漸地發覺茶餐廳係需要受到關注嘅行業，佢哋每日工作，好少休息，當你需要佢嘅時候，一踏入鋪頭，你想要咩佢就會煮俾你食，長期ready。
我自己其實係有一個comfort food list，總之，大概我去開邊個地方，都會有一兩間我嘅心水，做完嘢嘅時候我就會去嗰度食嘢。或者佢哋比不上foodie新式鋪頭，或大南街新式Cafe，亦未夠香港老店老，但當我需要佢嘅時候，我隨時都可以搵佢，食完我就會好滿足。
呢一兩年多咗時間喺屋企，煮多咗嘢食俾屋企人食，就會更明白到，食物，真係一個人生不可以缺少嘅嘢。我一直誤解，以為肚餓先需要食嘢，但其實唔係。主動分享食物，同有人分享食物俾我，都有不可取替嘅快樂感。所以今次喺「香港時地人」呢份individual功課裏面，就試吓同我心水comfort food餐廳傾偈之餘都想探討吓佢哋嘅comfort food！要佢哋推介佢哋嘅comfort food俾我，以接龍嘅方式繼續延續落去，開吓我個眼界！
我自己住石排灣邨，石排灣邨喺香港仔上邊。搬到呢度嘅原因係因為黃竹坑邨清拆重建，整個屋村嘅居民大部份都會搬到石排灣。依家諗返轉頭，發現好多之前黃竹坑邨嘅細微地方已經唔會再出現，只得零零碎碎嘅相片喺社交媒體流傳，所以特別想為依家我住嘅地方做啲記錄。起初搬去石排灣嘅時候，好多嘢都感到好新奇但又好陌生，印象深刻嘅就係去到熟食市場發現有好多嘢食而且價錢相宜，而且所有舖頭嘅員工都有傾有講，令我對呢個地方開始建立新感情。
當時「福興」就係其中一間我成日幫襯嘅餐廳，到依家出去做野之前食個早餐好多時都幫襯佢，員工同我都會互相打招呼，所以呢份功課嘅起步點就諗起佢！
1.【福興】
馮老闆及老闆娘
褔興就係我大概十幾年前搬到石排灣嗰陣，差不多第一二間成日落街食嘢嘅舖頭。最令我印象深刻嘅係佢哋嘅炒粉麵會加好多配菜，第一次食佢哋嘅時候份炒烏冬捧上枱，去到我面前嘅時候，我十分之喜歡，有好多色彩繽紛嘅青椒紅椒，令我食慾大增，感覺健康。
另外佢哋嘅湯米粉都好出色，佢嗰隻米粉，可以話我喺其他地方冇食過佢呢隻質地，食落口好溫和，好舒服。所以今次第一間我要去嘅一定係佢——褔興。
【馮老闆原來以前係一位漁民】
今次嘅訪問裏面，先至知道原來馮先生年輕時一直都係做漁民打魚，中間因為個女嘅關係，就轉行去賣魚，大概10幾年之前就轉到我屋企樓下嘅熟食市場做茶餐廳。對於我來講，馮先生由漁民轉做茶餐廳的確係一個好大嘅轉變，但馮老闆同我講有啲嘢「埋位就識做架啦」。雖然佢咁樣講得好簡單，但係我知道佢喺呢個崗位背後一定下過不少苦工。
「都無辦法嘅，要適應，要生存，要技能，其實（煮野）都無咩難度嘅，只要用心，要多參考，研究味道，希望唔好太多味精、太多油」。唔講唔知，其實馮先生係做茶餐廳之前連一隻碗都未洗過！佢嘅細佬妹聽到佢話要入茶餐廳，仲要做大鑊炒呢個位，一啲都唔信。但係因為屋企因為希望可以睇到兩個女兒嘅成長，佢由一個經常都要出海打魚嘅漁民（可能要一個星期至一個月先至可以返屋企），1995年就「上街」，即上岸唔再做打魚。
「因為以前嘅危險性大、有颱風、要出海、會有意外、要過境到越南……」
【沒有招牌菜】
我問佢，做咗大概10幾年茶餐廳有冇一樣招牌菜可以介紹吓，佢就好謙虛咁搖搖頭……「其實樣樣都唔得，勝左關係感謝好啲，客人體諒。」雖然係咁樣講，但係我知道佢每一項炒粉麵都會逐碟逐碟炒，老闆娘有時都會勸佢，但係佢都唔肯改。
「…豉油王炒麵，全港九都無架喇，係逐碟逐碟炒，唔係炒定，唔係兩個一齊炒。咁先夠熱，要啲功夫。因為大鑊炒個味道、份量會唔同。」
【石排灣街市火燭】
馮老闆同馮老闆娘兩位覺得最艱難嘅事，原來係要早起身！要朝早4:15就起身準備。其他野，佢哋都唔覺得特別困難……「困難，都係講心態，喺無冷氣嘅地方炒野好熱，但你唔好覺得佢熱，係免費桑拿！個爐起碼5、60度，要諗係『免費架日日都有！』可以排汗……有時要向好方面諗，成日諗佢係辛苦就會愈做愈辛苦，所以有陣時都要呃下自己就開心啲。」
當我問到之前街市因為火燭要暫停營業嘅時間，會唔會好難捱，馮老闆都唔覺得好難捱，就當係休息下，要接受個意外，又未至於冇飯食！咁咪食少啲、洗少啲慳住慳住。
「人嘅本能就係有空氣、有食物、有水，咁就OK架啦，我哋唔需要好高嘅享受、好多嘅錢，都可以好開心架嘛！做人最緊要健康、快樂、開心。物質上嘅東西冇乜用，追唔到……我覺得我自在過李嘉誠，唔使擔心俾人綁架，唔使擔心公司嘅嘢。」
【檸檬青瓜水】
最後，要多謝老闆娘因為我呢個訪問特登炮製咗hidden menu嘅凍檸檬青瓜水，非常清熱解暑。❤️
2.【耀記咖啡】
齡姐（李女士）
第二間我要去訪問嘅，就係福榮馮老闆娘介紹我嘅，位於香港仔熟食市場「耀記咖啡」嘅豬扒麵。
喺香港仔住咗咁耐，其實我好少去香港仔熟食市場，所以我之前都未食過耀記。帶住超級好奇嘅心態去到，果然馮老闆娘冇介紹錯！耀記豬扒麵真係好好食！我一路食一路諗，點解我咁耐都未食過嘅呢？
原來耀記喺香港仔已經有70年嘅歷史，原來係老闆娘齡姐，同佢兩位姊妹嘅爸爸所開，當時佢爸爸開業嘅時候，香港仔熟食街市仲未建成，只係位於香港仔大排檔嘅一個舖頭。當然依家香港仔大排檔已經冇咗，大概38年之前，有搬到香港仔熟食市場呢個街市裏邊。
齡姐13歲嘅時候就幫爸爸手，一直到而家已經做咗50年。由當時最初餐牌食物只得奶茶、咖啡、蛋治、奶油多，一啲簡單嘅食材開始。慢慢因為時代嘅轉變，客人食嘢嘅款式多元化咗，又開始增加蛋牛治、腿蛋治、焗統一福面，到現時呢間舖頭有出前一叮、炒粉麵、意粉、炒公仔麵。新式嘅食物都係佢哋三姊妹後期自己研究出嚟，希望唔好同時代脫節。
佢仲同我分享以前大排檔嘅客人係唔需要餐牌就可以叫嘢食，因為大概都係嗰啲。
【唔同年齡層嘅客人】
耀記喺香港仔咁多年，當然有唔同年齡層嘅客人喇！佢同我分享，最老最老嘅客人有103歲，到而家佢都係一個星期就會大概上嚟一次，同老闆娘甚至客人傾偈。因為已經103歲，所以每次佢嘅仔女都會陪佢上嚟。
最細嘅客人就只有一歲零兩個月！係幾代人嘅客人啊！
【招牌菜】
顧客們都會鍾意食呢度嘅公仔麵，會逐個逐個煮，唔會因為依家嘅顧客，要求快啲就會煮定，「就算放假，有啲客人食嘢都追快啲，唔耐煩，但我哋都唔會好似出邊行家咁滿足佢哋嘅需求。」
而我食過佢哋嘅豬扒麵，真係覺得佢哋煮嘅麵幾好食。雖然佢個豬扒同出邊好唔同，佢雖然唔係大大塊，但係你見到佢揼過、煎過，細細塊，好易入口，睇得出心思，食落好有家庭味道。而且醃得入味。而家諗返起都想再返去食。
【服務好】
喺呢度食嘢嘅經驗話俾我知，齡姐係一個好親切嘅老闆娘。當檸檬茶嚟到嘅時候，佢會問我要唔要糖；當豬扒麵嚟到嘅時候，佢又會問我要唔要辣椒油；最後食晒之後，佢仲會遞上牙籤。
齡姐希望嚟到嘅客人，都可以有賓至如歸嘅感覺。
【香港街市裝修】
因為香港仔街市冇冷氣裝置，所以喺今年2021年11月1號就會暫時關閉裝修，14個月後就會重新啟用。被問到耀記之後嘅去向，齡姐話都要睇之後嘅租金如何，先至決定到會唔會繼續經營。雖然今次係我第一次食耀記，但聽到呢度我都有啲唔捨得。
齡姐雖然唔捨得，但係佢知道身邊好多連鎖快餐店，佢哋都係因為呢啲舖頭而令到生意下跌。「人流分配同以前唔同，所以變咗競爭（力）比人弱，生意會少咗，覺得係時候退出。時代太快，汰弱留強，就會覺得係時候放手，亦係時候退休。」
【中央事務所】
齡姐同我講呢度嘅客人已經唔係客人，喜慶節目會互相請飲，無所不談，一齊分享及分擔，大家就好似兄弟姊妹咁。
最令我印象深刻嘅係，齡姐同我講，有陣時喺傾談之間會知道街坊需要幫忙，佢就會諗起另一位街坊有機會幫到手，佢就會好似「中央事務所」咁幫兩邊街坊撮合，令事情可以快啲化解。齡姐仲同我講佢好鍾意蒐集一啲資訊，例如邊個醫生好，佢會儲低，到真係有需要嘅街坊問起嘅時候，佢就會介紹俾佢。雖然街坊有時唔係直接得到佢嘅幫忙，但係齡姐會樂在其中，咁樣做令佢好開心，係一種樂趣。
【禪繞圖】
齡姐除咗鍾意幫助街坊之外，佢都有同我分享佢喜歡研究佛學、禪修、哲學、學畫畫，佢仲同我分享佢嘅畫作，佢鍾意畫嘅係我未聽過嘅「禪繞圖」，係種幫自己嘅心靈治療嘅圖。佢亦都同我分享，如果將來有機會，希望可以考個證書班，喺其他地方同人分享，幫到人又有意義。
【結尾】
雖然今次呢份功課裏只係訪問到兩間茶餐廳，但係我希望，過左呢個展覽之後，我可以繼續呢個接龍遊戲，繼續問不同老闆佢哋嘅comfort food，我相信，佢會帶我到不同香港嘅地區，食不同嘅食物，一定會遇到不同鋪到嘅故事。
為咗記錄老闆們嘅介紹、佢哋嘅故事，我開左個ig，想每一個過程都記錄低，希望與更多人分享。@yuenhiuman
【鳴謝】（排名不分先後）
留白工作室 @leaveitblankworkshop
my family
Kwokyiu Liu
大舊 @Daidai.9
